Футбол бўйича ЖЧ—2018 3-саралаш босқичида иштирок этадиган Ўзбекистон миллий терма жамоаси Иорданияга қарши ўртоқлик учрашувини аввал хабар қилинганидек 10 июнь куни эмас, 10 ноябрь куни ўтказади.
Ўзбекистон футбол федерациясининг расмий сайтига 28 апрель куни жойлаштирилган хабарда ўртоқлик ўйини санаси 10 июнь деб кўрсатилганди.
Бу янгилик бир қатор нашрларда, жумладан, «Дарё»да ҳам кўриниш бергач, ЎФФ матбуот хизмати беллашув санасини 10 ноябрга ўзгартирган.
ФИФА расмий сайтида ҳам учрашув санаси деб ноябрнинг ўнинчи куни кўрсатилган.
Қайд этиш керак, 15 ноябрь куни Ўзбекистон миллий терма жамоаси ЖЧ—2018 3-саралаш босқичининг 5-турида Жанубий Кореяга қарши сафар ўйинида иштирок этади. Иорданияга қарши беллашув эса катта эҳтимол билан расмий ўйин олдидан тайёргарлик вазифасини ўтаб беради.
Маълумот учун, ЖЧ—2014 саралашидан ўрин олган Жанубий Кореяга қарши сафар учрашувидан 5 кун олдин Ўзбекистон миллий терма жамоаси Хитойга қарши ўртоқлик ўйинида майдонга тушган. Шу саралашнинг 2-босқичидан ўрин олган Японияга қарши сафар ўйинидан 4 кун олдин эса Жанубий Корея билан ўртоқлик ўйинида иштирок этган.
Аввал хабар қилинганидек, Самвел Бабаян мураббийлигидаги Ўзбекистон терма жамоаси 7 июнь куни Канадага қарши Австрияда ўртоқлик учрашуви ўтказади.
