Футбол ўйини жуда қизиқ. Бугун ғалаба қозонсанг, эртага мағлубиятга учрашинг тайин. Футбол оламида мағлубиятга учрамаган жамоанинг ўзи йўқ. Ҳатто машҳур клублар ҳам рақиб олдида бош эгишга мажбур бўлишади. Бу – футболнинг ёзилмаган қонуни.
Айни дамда “Қўқон-1912” жамоаси мағлубиятлар гирдобида қолиб кетди. Жамоамиз сўнгги тўртта учрашувда рақибларга имкониятни бой бериб қўйди. Лекин бу билан ҳаёт тўхтаб қолгани йўқ. Мавсумнинг асосий қисми ҳали олдинда. Ҳозирда мураббийлар штаби жамоамизни юзага келган қийин вазиятдан олиб чиқиш учун бор кучларини ишга солишмоқда. Олдинда бизни қийин ўйинлар кутиб турибди. Тайёргарлик режаси ҳам шунга монанд равишда тузиб чиқилмоқда.
Бекободдаги ўйиндан кейин футболчиларга қисқа муддатли таътил берилди. Жамоамиз аъзолари 3 май кунига қадар дам олишади. Эртадан эса “Бунёдкор”га қарши кечадиган учрашувга тайёргарлик бошланади.
Навбатдаги баҳсда вакилларимизга омад тилаб қоламиз.
