Москванинг «Спартак» жамоасининг ҳолландиялик ёш футболчиси Куинси Промес банан тановул қилди ва аксилирқчилик ҳаракатини қўллаб-қувватлади. Бу ҳақда «Чемпионат.com» хабар берган.
Келиб чиқиши суринамлик бўлган 24 ёшли футболчи «Лукойл» ҳомийлиги остида, «Расизмга қарши ўйна» шиори остида ўтказилаётган болалар ўртасидаги Чемпионлар кубоги турнирининг фахрий элчиси бўлган.
«Биз турли мамлакатларда туғилганмиз, бизнинг териларимиз ранглари турлича, биз турли тилларда сўзлашамиз, лекин футбол туфайли ҳамиша бир-биримизни тушуна оламиз. Шунинг учун мен Россиядаги барчани футболни севишга чақираман ва "Спартак" жамоаси мухлисларига эзгу тилакларимни йўллайман», — дея мухлисларга юзланган Промес.
«Лукойл» ҳомийлигидаги болалар ўртасидаги Чемпионлар кубоги турнири август ойида Москва шаҳридаги «Спартак» жамоасининг уй стадиони «Открытие Арена»да ўтказилади.
Промес 2014 йилдан буён москваликлар жамоаси сафида ўйнаб келади. У Россия жамоасига Нидерландиянинг «Твенте» клубидан келган. Промес «Спартак» сафида 54 учрашувда майдонга тушган ва 27та гол урган.
