Хориж чемпионатларида тўп сураётган бир қатор ўзбекистонлик футболчилар ўз жамоалари сафида навбатдаги тур учрашувларида майдонга тушишди.
РОССИЯ
Москванинг "Локомотив" клуби ҳимоячиси Виталий Денисов Россия Премьер-Лигаси 28-тури доирасида "Кубань"га қарши учрашувда майдонга тушди. "Локомотив" майдонида бўлиб ўтган учрашувда "Кубань" 1:0 ҳисобида ғалаба қозонди. Ўзбекистон миллий терма жамоаси ҳимоячиси мазкур учрашувда асосий таркибда майдонга тушди ҳамда 90 дақиқа ҳаракат қилди.
"Краснодар" клуби сафида тўп сураётган Ўзбекистон миллий терма жамоаси сардори Одил Аҳмедов мазкур турда ўз майдонида "Крылья Советов" клубига қарши учрашувда асосий таркибда майдонга тушди, аммо жароҳат олгани боис 15-дақиқада алмаштирилди. Айни дамда, ўзбекистонлик футболчи тиббий кўрикдан ўтмоқда.
БАА
Ўзбекистон миллий терма жамоаси ярим ҳимоячиси Азиз Ҳайдаров БАА Про-Лигаси 26-тури доирасида "Аш Шабоб" таркибида майдонга тушди. Ўз майдонида "Ал Васл"ни қабул қилган "Аш Шабоб" учрашувда 1:0 ҳисобида ғалаба қозонди. Ўзбекистон миллий терма жамоаси ярим ҳимоячиси мазкур учрашувда асосий таркибда майдонга тушди ҳамда тўлиқ 90 дақиқа ўйнади.
ҚОЗОҒИСТОН
Қозоғистоннинг "Ордабаси" клубида тўп сураётган Ўзбекистон миллий терма жамоаси ҳужумчиси Александр Гейнрих Қозоғистон Премьер-Лигаси 10-тури доирасида Караганданинг "Шахтер" клубига қарши майдонга тушди. Ушбу учрашувда "Ордабаси" 2:0 ҳисобида ғалаба қозонди. Ўзбекистон миллий терма жамоаси ҳужумчиси Александр Гейнрих учрашувнинг 72-дақиқасида захирадан майдонга тушган.
