Бугун Ургенч шаҳрида 2004 йилда туғилган ўсмирлар ўртасида Ўзбекистон чемпионати бошланди. Чемпионатда тўққизта жамоа учта гуруҳга бўлинган ҳолда қатнашмоқда.

Чемпионатда вилоятимиз шарафини Аъзам Ражаббаев ва Раҳим Ғофуров мураббийлигидаги ўсмирларимиз ҳимоя қилишмоқда. Ўсмирларимиз “А” гуруҳида Бухоро ва Тошкент вилоятидан келган тенгқурлари билан баҳс олиб боришади. “В” гуруҳида Қорақалпоғистон Республикаси, Фарғона, Навоий вилоятлари, “С” гуруҳида Хоразм, Жиззах, Сирдарё вилояти терма жамоалари ғолиблик учун курашга киришганлар.
Бундан бироз вақт олдин вакилларимиз Ўзбекистон чемпионатидаги дастлабки учрашувни Тошкент вилояти терма жамоасига қарши ўтказишди. Ўйин давомида тўлиқ устунликка эга бўлган футболчиларимиз якунда 3:0 ҳисобидаги ғалабани қўлга киритишди. Эртага гуруҳдаги рақибларимиз Бухоро ва Тошкент вилояти терма жамоалари ўзаро баҳс олиб боришади. Ўсмирларимиз гуруҳдаги сўнгги учрашувни 20 май куни бухороликларга қарши ўтказишади. Гуруҳларда ғолибликни қўлга киритган ва энг яхши кўрсаткичга эга иккинчи ўрин соҳиблари курашни ярим финалда давом эттириш имкониятини қўлга киритишади. Ўзбекистон чемпионатининг финал учрашуви эса 23 май санасига режалаштирилган.