Футбол маэстроси Диего Марадона Мексикадаги “Текейт” пивоси реклама ролигида худо ролини ўйнади. Роликнинг мазмуни қуйидагича: оппоқ костюм-шим кийган 55 ёшли Марадона пайғамбар Нуҳдан стадион қурилиши муддатини тезлаштириш ҳақида сўрайди ва пича дам олиши учун пиво ичишни таклиф этади.

Нуҳ стадион қурилишини ўз зиммасига олган бўлса-да, роликда қурилишга зарур бўлган молиянинг етишмаслиги ҳақида сўз очилмаган. Стадион қуриб битилгандан сўнг, ўйинчилар ўрнига, турли жониворлар стадионга тушиб, ўз машқларини бошлашади. Шу ерга келганда тўсатдан ҳаво айниб, ёмғир ёғади.

Клипда, шунингдек, "Реал" футболчилари Пепе, Тони Кроос, Кейлор Навас, "Ювентус"дан Патрис Эвра, Алекс Сандро, Андреа Барцальи ҳам роль ижро этган.

Ролик “Қачонлардир ёмғир тўхтаб, қуёшли кунлар келади ва биз ўз ўйинимизни давом эттирамиз. Бизни Текейт қўлламоқда”, деган сўзлари билан якунланган.