Осиё чемпионлар лигасининг чорак финалига қуръа ташлаш маросими қачон ва қай тарзда ўтказилиши ҳақида маълумот бериб ўтамиз.

Қуръа ташлаш маросими 9 июнь куни ОФК қароргоҳи жойлашган Куала-Лумпур шаҳрида бўлиб ўтади.

Финалга қадар Ғарбий Осиё ва Шарқиё Осиё мамлакатлари клублари тўқнаш келишмайди. Шу боис, чорак финалда "Локомотив" фақат Ғарб минтақаси клубига қарши тўқнаш келади. Ҳозирча "темирйўлчилар"дан ташқари БААнинг "Ан-Наср" клуби 1/4 финал йўлланмасини қўлга киритди. Хабарингиз бор, бу жамоа "Локо" билан бир гуруҳда иштирок этганди. "Наср" бугун Эроннинг "Тракторсозий" клубига 1:3 ҳисобида ютқазганига қарамай, ўз уйидаги 4:1 ҳисобидаги ғалаба туфайли кейинги босқичга йўл олди.

Ғарбий минтақада чорак финалнинг яна икки иштирокчиси номи эртага маълум бўлади. Қатарнинг "Ал-Жаиш" клуби амалда кейинги босқич йўлланмасини ҳал қилиб бўлган. Сардор Рашидов жамоаси дастлабки ўйинда "Лахвия" майдонида 4:0 ҳисобида зафар қучганди.

Яна бир чорак финал йўлланмаси "Зоб Оҳан" (Эрон) ва "Ал-Айн" (БАА) жамоалари ўртасидаги ўйинда аниқланади. Амирликда ўтган дастлабки ўйинда 1:1 ҳисобида дуранг қайд этилган.

Шунингдек, Шарқда "Шангхай СИПГ" (Хитой) ва "Чжонбук Хёндэ Моторс" (Жанубий Корея) клублари бугун чорак финал йўлланмасини ҳал қилишди. "Сеул" - "Урава Редс" ва "Сидней" - Шандонг Луненг" ўйинлари билан яна икки чорак финалчи номига аниқлик киритилади.

Чорак финал ўйинлари 23-24 август ва 13-14 сентябрь кунлари ўтказилади.

Ярим финал босқичига қуръа ташланмайди. Бунга ҳожат қолмайди. Ғарбнинг икки, Шарқнинг икки жамоаси ярим финалда ўзаро тўқнаш келишади ва финалчиларнинг номи аниқ бўлади. Ярим финал баҳслари 27-28 сентябрь ва 18-19 октябрь кунлари ўтказилади. Финал учрашувлари 19 ва 26 ноябрь кунларига белгиланган.