Буюк Британия полиция зобитлари бўлинмаси Францияда бўлиб ўтадиган футбол бўйича Европа чемпионатига кўп сонли британиялик спорт мухлислари билан биргаликда йўл олиб, франциялик ҳамкасбларига ёрдам беради. Бу ҳақда, The Times нашрига асосланиб, «ТАСС» хабар бермоқда.
Таъкидланишича, полиция Англия ва Уэльс терма жамоалари иштирокидаги ўйинларда «маданият таржимонлари» сифатида қатнашиб, одатда қаттиққўллик билан ҳаракат қиладиган Франция махсус кучлари мухлисларга нисбатан ортиқ даражада қўпол ишламаслигини назорат қилади.
«Чет элда кўплар Англиянинг асосий муаммоси футбол ўйинларидаги зўравонлик деб ўйлар эди, аммо бу стереотип эскириб кетди», — деди махсус бўлинмага раҳбарлик қиладиган полиция суперинтенданти Стив Нилл.
Бу миссиянинг амалга оширилиши учун Франциянинг рухсати талаб этилади.
11 июнь куни англиялик футболчилар Марселда Россия терма жамоасига қарши майдонга тушган пайтда биринчи кескинлик юзага келиши мумкинлиги тахмин қилинмоқда. Нашрнинг уқтиришича, полициячилар россиялик ва англиялик безориларнинг тил бириктириши ҳолатларини аниқлаш мақсадида ижтимоий тармоқларни кузатиб бормоқда. Шунингдек, британиялик ва россиялик томошабинлар диний экстремистлар нишонига айланиши мумкинлиги билан боғлиқ таҳдидлар бор.
Европа чемпионати террорчилик таҳдиди бутунлай бартараф қилинмаган мураккаб бир шароитда ўтмоқда. 2015 йилнинг ноябрь ойидаги терактлардан сўнг Францияда жорий этилган фавқулодда ҳолат Евро–2016 ва «Тур де Франс» велопойгаси ўтказилиши муносабати билан июль ойининг охирига қадар узайтирилди.
