Бухорода бўлиб ўтадиган учрашувга тайёргарликка киришган жамоамизнинг Тошкентдаги йиғини давом этмоқда.

Тошкентдаги “Ўзбекистон” меҳмонхонасида истиқомат қилаётган жамоамиз аъзолари машғулотларни пойтахтдаги “Солиқчи” ўйингоҳида олиб боришмоқда. Кеча бир маҳаллик машғулот билан чекланган футболчиларимиз бугун режага кўра икки маҳал шуғулланишади. Эрталаб тренажёр залида машқларни бажарилган бўлса яна икки соатдан кейин “Солиқчи” ўйингоҳидаги машғулот бошланади. Жамоамизнинг Тошкентдаги йиғинида умумий ҳисобда 22 нафар футболчи қатнашмоқда. Азиз Ғуломхўжаев жароҳат сабабли, Санжар Асқаралиев эса маълум сабабларга кўра машғулотларда иштирок эта олишмаяпти. Ғуломхўжаев жароҳатини даволамоқда. Асқаралиев эса вақтинчалик тарзда жамоа ёшлари билан машғулот ўтказмоқда.
Жамоамиз аъзолари Тошкентдаги машғулотларни 28 майга қадар давом эттиришади. 28 май куни эрта тонгда эса Бухоро шаҳри сари йўлга тушилади. 29 май куни бўлиб ўтадиган “Бухоро” ва “Навбаҳор” жамоалари ўртасидаги учрашув “Бухоро” спорт мажмуасида соат 19.00да бошланади. Ёшлар ўртасидаги баҳс эса 28 май куни соат 17.00да старт олади.