Италиялик машҳур опера тенори Андреа Бочелли Чемпионлар Лигаси финалида мусобақа мадҳиясини куйлайди. Бу ҳақда УЕФА расмий сайти хабар берди.

Европа Чемпионлар Лигаси финали 28 май, шанба куни Миландаги “Сан-Сиро” стадионида бўлиб ўтади. Унда Мадриднинг икки жамоаси – “Реал” ва “Атлетико” ғолиблик учун кураш олиб боради.

“Чемпионлар Лигасидек буюк ҳодисанинг бир бўлагига айланиш имконияти – мен учун катта шараф! Мен болалигимдан футбол ишқибозиман ва мадҳияни қўлимдан келганича яхши куйлашга ҳаракат қиламан. Берилган имконият учун раҳмат, стадионда кўришгунча!”, - деди асли кўзи ожиз хонанда.

Финал учрашувининг очилиш маросимида, шунингдек, америкалик хонанда Алиша Кийз ҳам иштирок этиб, учрашув арафасида қўшиқ куйлайди.