«Атлетико» бош мураббийи Диего Симеоне эртага бўлиб ўтадиган Европа чемпионлар лигаси финалида «Реал»га қарши ўйин олдидан ўз фикрларини билдириб ўтди.

«Ўйин шиддатли, тенгкурашлар остида ўтади, айниқса, ўйин бошида. Каземиро эвазига тўпни йўқотган пайтда рақиб футболчилари тезда ўз жойини эгаллаб улгуради ва ҳимоядаги салоҳиятини кучайтириб боради. Майдон марказида ким яккакурашларда ғолиб чиқса, ўша устунликка эга бўлади. «Реал» футболчилари юқори техникага эга бўлгани боис, ўзларига очиқ ўйинни эп кўришлари мумкин.

Бизнинг клуб, ўйинчилар қайта-қайта ўзини кашф қилмоқда. Бу клубдаги энг қимматли нарса. Барча ривожланиш устида ишламоқда. Бу ҳаёт — ишлайсан, ишлайсан, ишлайсан ва якунда мақсадингга эришасан.

Финалда ўйнаш — фантастика, аммо ғалаба қозониш — янада яхши. Бу бизни қувончли лаҳзаларни орзу қилишга мажбур қилади. Албатта, осон бўлмайди. Фикрни жамлашни, доимо яхши ўйнашга ҳаракат қилишни, футболчиларнинг жойлашувини ўзгартиришни, жонфидоликни йўқотмасликни, ишга бўлган муҳаббатни сақлаб қолишни билишимиз керак. Сидқидилдан ишлашда давом этсанг, кўп нарсаларга эришишинг мумкин.

Ўз ўйин услубимизда кўп нарсаларни ўзгартирмаймиз, шунингдек, «Реал» ҳам ўзгартирмайди. Улар 2014 йилдан бери унчалик ўзгаришмади. Бизнинг сафимизда эса кўп ўзгаришлар бўлди, лекин структурани сақлаб қолдик. Каземиро «Реал»ни қарши ҳужумда хавфли рақибга айлантирган. Жамоа «Манчестер Сити»га қарши ярим финал ўйинида шундай ҳаракат қилди. Кўпчилик буни нотўғри деб ҳисоблайди, аммо мен эмас. Ўйин давомида турли вазиятлар бўлади, лекин «Реал»га ҳудуд тақдим этилса, у жуда хавфли жамоага айланади.  

Менга жамоамизнинг 113 йиллик тарихини елкамда кўтариш ёқади. Менга босим ёқади. Мени фақат ғалаба қаноатлантиради», — дейди Симеоне.