Бекор қилинган Ўзбекистон-Экваториал Гвинея ўртоқлик ўйинига сотиб олинган чипталар билан 1 сентябрь куни Тошкентда ўтказиладиган Ўзбекистон-Сурия учрашувига кириш мумкин бўлади. Ўзбекистон Футбол Федерацияси ишқибозларнинг талаб ва истакларидан келиб чиққан ҳолда бекор қилинган ўртоқлик ўйинининг чиптасини Сурияга қарши ўйин учун ҳақиқий деб эълон қилади.
Ўзбекистон-Экваториал Гвинея учрашувига сотиб олинган чипталарни август ойида “Бунёдкор” стадиони кассаларида Ўзбекистон-Сурия ўйинининг чиптасига алмаштириш мумкин. Алмаштириш асносида фақат чиптанинг ўзи бўлиши кифоя қилади.
Бунинг учун қўлида Ўзбекистон-Экваториал Гвинея ўйинининг чиптаси бор ишқибоз 1 сентябрь куни бўлиб ўтадиган Ўзбекистон ва Сурия ўртасидаги ўйин арафасида “Бунёдкор” стадионининг махсус кассасига келиб, чиптасини Ўзбекистон-Сурия ўйини чиптасига алмаштиради. Алмаштирилаётган чипта қайси сектор ва жойга сотиб олинган бўлса, ўша сектор ва жой кўрсатилган янги чипта берилади. Демак, 1 сентябрдаги ўйин учун Экваториал Гвинеяга қарши ўйинга сотилган жойларга чипта сотилмайди ва у фақат эски чиптага алмаштириб берилади.
Чиптани алмаштириш тартиби Сурияга қарши учрашув арафасида қўшимча эълон қилинади.
Шу билан бирга чиптани алмаштирмай, пулини қайтаришни истаган ишқибозлар ўрнатилган тартибда “Бунёдкор” стадиони маъмуриятига мурожаат қилишлари мумкин.
