Эрон футбол федерацияси президенти Меҳди Таж миллий терма жамоанинг ЖЧ-2018 саралаш босқичидаги имкониятларини юқори баҳолади.

"Мен Жанубий Корея терма жамоасининг сўнгги бир нечта ўртоқлик ўйинларини кўрдим. Айтишим мумкинки, бу жамоани мағлуб этиш қийин бўлади. Ўзбекистон ва Хитой яхши терма жамоалар ҳисобланади. Қатар эса ўз сафига бир нечта хорижлик футболчиларни қўшиб олди. Рақибларга ҳурматни сақлаган ҳолда айтаман, Эрон гуруҳнинг қолган 5та жамоасига нисбатан кучли", - дейди Таж.

Эрон терма жамоаси Македония ва Қирғизистон терма жамоаларига қарши ўртоқлик учрашувларини ўтказиб, мос равшда 6:0 ва 3:0 ҳисобида ғалаба қозонди.

"Македонияга қарши ўртоқлик ўйини самарали бўлди. Шунингдек, биз янада кучлироқ терма жамоаларга қарши ўртоқлик учрашувларини ўтказишимиз керак, деб ҳисоблайман. Ўртоқлик ўйинларини ташкил қилиш учун бизга вақт керак. Аммо кучли рақибларга қарши ўйинлар ташкил қилиш учун етарли бюджетга эга эмасмиз", - дейди ЭФФ президенти.

Эслатиб ўтамиз, Эрон терма жамоаси ЖЧ-2018 3-саралаш босқичида Жанубий Корея, Ўзбекистон, Хитой, Қатар ва Сурия билан бир гуруҳдан жой олган.