Ғузорда бўлиб ўтадиган “Шўртан” ҳамда “Пахтакор” жамоалари учрашувидан олдин мезбон жамоада вақтинча бош мураббий вазифасини бажариб турган Ихтиёр Тоғаевич қуйидаги фикрларни билдириб ўтди:

Ҳар икки жамоанинг турнир жадвалидаги эгаллаб турган ўрни ва тўплаган очколаридаги фарқни ҳисобга олмаганда, “Шўртан”га ҳам, “Пахтакор”га ҳам очколар сув ва ҳаводек зарур. Масалан биз хавфли ҳудудни тарк этиб, юқорига интилмоқдамиз ва ўз мавқеимизни янада мустаҳкамлаш йўлида боряпмиз. Мавсум бошидаги омадсизликлар ортда қолди ва бу ҳақда умуман ўйлаётганимиз йўқ. Режаларимиз тубдан ўзгариб кетди. Эндиги мақсадимиз фақат ютуқ ва олдинга чиқиб бориш. Бу эса ҳар бир учрашувда максимал натижага эришишни талаб этади.    

Рақибимиз - “Пахтакор” мамлакатимизнинг энг номдор ва байроқдор жамоаси, ҳар томонлама ҳурматга сазовор. Юқоридаги фикрларимиздан келиб чиқиб шуни айтишим мумкинки, тошкентликлар ҳам бу йилги мавсумни бироз нотекис бошлаган эди. Лекин сўнгги турларни яна ижобий натижалар билан якунлашмоқда. Табиийки, меҳмонларимиз ҳам Ғузоргаочко олиш мақсадида ташриф буюришади.

Ўз навбатида биз ҳам қараб турмаймиз. Бир сўз билан айтганда, кескин ва қизиқарли курашларга бой ва зўр учрашув бўлади.

“Шўртан” ПФК матбуот хизмати