“Навбаҳор” ва “Металлург” жамоалари ўртасидаги учрашувдан сўнг, “Навбаҳор” жамоаси бош мураббийи Александр Волков ўз фикрларини билдириб ўтди:

- Ижобий натижани кутгандик. Бугунги учрашувда қандай қилиб бўлмасин ғалаба қозонишимиз талаб этиларди. Футболчилар ҳам буни ҳис қилиб туришганди. Аммо, қандайдир босим таъсир ўтказиб, биринчи бўлимдаги ўйинимиз қовушмай кутилмаганда “курёз” голни ўтказиб юбордик. Танаффусдан кейин гол уриш учун кўплаб вазиятларни юзага келтирдик. “Металлург” дарвозабони бор маҳоратини намойиш этган ҳолда мўъжиза кўрсатиб имкониятларимизни йўққа чиқишига сабабчи бўлди. Футболда бежизга дарвозабон ярим жамоа деб айтишмайди. Ҳар ҳолда учрашув давомида бир нечта ўйинда ҳам юзага келтирмаган вазиятларга эга бўлгандик. Шу сабабли йигитларга эътироз йўқ. Рақиб посбонига офарин дейишдан ўзга чорамиз қолмади. Чунки жамоасини муқаррар голлардан сақлаб қолди. Мамазулумов анча вақтдан бери майдонга тушмаётганди. Машғулотларда муносиб тарзда ҳаракат қилаётганлиги учун бугун амалда синаб кўришга қарор қилгандик. Уни тажрибасини инобатга олган ҳолда асосий таркибга киритгандик. Афсуски, танаффусда уни алмаштиришга мажбур бўлдик.