Спорт кийимларини ишлаб чиқарувчи Nike компанияси аёл теннисчиларнинг шикоятига биноан Уимблдон–2016 теннис турнири учун мўлжалланган ўта калта кўйлакларни алмаштиради. Бу ҳақда Daily Mail нашрига таяниб, «ТАСС» хабар бермоқда.
Маълум қилинишича, турнирнинг аёл иштирокчилари Уимблдон учун махсус ишланган Nike Premier Slam кўйлаклари бел қисмидан юқорига чиқиб кетиши туфайли ўйинга бўлган эътиборни йўқотиши ҳақида шикоят қилган. Nike раҳбарияти спортчиларнинг вакилларига кўйлакларнинг ўзгартирилган вариантини турнир ўтказиладиган ҳудуд атрофида жойлашган компания офисидан олиши мумкинлигини маълум қилди.
«Катта дубулға» туркумига кирувчи мавсумнинг энг йирик учинчи турнири 27 июнь куни Лондон шаҳрида старт олади. Ушбу турнирда теннисчилар фақатгина оқ кийимларда кортга чиқишига рухсат берилган.
Қайд этиш жоиз, Уимблдон–2016 теннис турнирининг мукофот жамғармаси 28,1 миллион фунт стерлингни ташкил этади. Эркаклар ўртасида сербиялик Новак Жокович, аёллар ўртасида америкалик Серена Уильямс ушбу мусобақанинг амалдаги ғолиби ҳисобланади.
