Кеча бўлиб ўтган “Насаф” - “Сўғдиёна” учрашувидан сўнг, учрашув якунларига бағишланган матбуот анжумани бўлиб ўтди. Матбуот анжуманининг дастлабки қисмида “Сўғдиёна” жамоасининг бош мураббийи Даврон Файзиев иштирок этди.

-Эртага бўладиган байрам муносабати билан барча ОАВ ходимларини табриклайман. Ўйин ҳақида гапирадиган бўлсам, йигитларда биринчи бўлимда ишонч етишмади. Агар биринчи бўлимда дастлабки 30 дақиқада эҳтиёткор бўлганимизда, бугун очко билан қайтишимиз мумкин эди. Иккита қўпол хато голга олиб келди.

Иккинчи бўлимда гол урдик. Вақтимизни кутдик. “Насаф” бироз бўшашди. Аммо қаршиликлар тажрибаси ўз сўзини айтди. Дарвозабонимиз анчадан бери майдонга тушмаганди. 8- турдан бери Музаффар Абдуллаев дарвозамизни қўриқлаётганди. У бетоб бўлгани учун Темур Ғаниевни бугун майдонга туширдик. Унда ўйин амалиёти камлиги сезилди. Жиямуродов, Ориповда кичик жароҳати бор эди. Холмуҳаммедовни учта сариқ карточкаси боис кейинги ўйинга асраб қўйдик. Чунки кейинги турда ўз майдонимизда “Қизилқум” билан куч синашамиз.