Ўзбекистон миллий терма жамоасининг биринчи рақамли дарвозабони Александр Лобанов фаолиятини катта эҳтимол билан янги клубда бошлайди. Эроннинг «Персеполис» клуби шарафини ҳимоя қилаётган посбон шу кунларда жамоаси билан бирга ўқув-машғулот йиғинини ўтказмоқда. Эътиборга молик жиҳати, «Персеполис»нинг йиғини Украина пойтахти Киев шаҳрида ташкил этилмоқда. Жамоа «Динамо» клубига тегишли базада тайёргарлик кўряпти.

Ўз ўрнида миллий терма жамоамиз ҳам эртадан навбатдаги йиғинга тўпланади. Бош жамоамизнинг йиғини Австрия­да ўтказилади. Бу йиғинга асосан маҳаллий, яъни олий лига клубларимизда тўп тепаётган футболчилар жалб қилинади.

Аслида бу йиғин биз учун керакмикан? Унинг қандай фойдаси бор? ФИФА куни бўлмаса? Клублардан футболчиларни «юлиб» олиб, йиғинга олиб кетиш шартми? Қишда йиғин, ёзда яна йиғин... Футболчилар қачон дам олишади? Терма жамоанинг йиғини клубларнинг режаларига салбий таъсир қиляпти-ку! Фақат миллий терма жамоа манфаатини ўйлаш, аксинча, уни клубдан устун қўйиш ҳам тўғри эмас. Масалан, терма жамоага бошқаларга қараганда, кўпроқ футболчи жўнатадиган «Локомотив» клубининг ҳам ўз режалари бор. «Темирйўлчилар» ОЧЛнинг чорак финал босқичидан ўрин олган ўта муҳим ўйинларга тайёргарлик кўришяпти. Хуллас, саволлар бисёр. Унга жавоб берадиган мутахассис эса йўқ. Биз терма жамоамизнинг ана шу йиғини олдидан Александр Лобанов билан боғландик ва мавзу юзасидан суҳбатлашдик.

- Бизга маълум бўлишича, терма жамоамиз Тошкентда йиғилади ва Австрияга йиғин ўтказиш учун жўнаб кетади. Айтингчи, терма жамоадан чақирув олдингизми?

- Менимча, терма жамоага чақирилган футболчилар 6-7 июль кунлари Тошкентда тўпланишади. Ке­йин эса Австрия йиғинига йўл оладилар. Менга таклиф келмади. Чақирув олган тақдиримда ҳам, мен фаолият юритаётган клуб қўйиб юбормасди. Боиси, ҳозир ФИФА кунлари эмас. «Персеполис»нинг бунга тўлиқ ҳаққи бор. Айни пайтда мен жамоам билан биргаман. Ўқув-машғулот йиғинини ўтказяпмиз.

- ФИФА куни эмаслигини инобатга олсак, Австриядаги йиғин фақат маҳаллий футболчилар учун бўлар экан-да?

- Худди шундай.

- «Персеполис»нинг йиғини қаерда ташкил этиляпти?

- Киев  шаҳрида. «Динамо» клубининг базасида шуғулланяпмиз.

- Эрон клуби ўз йиғинини Киев шаҳрида ўтказаётгани бироз ғалати туюляпти...

- Нега энди. Клуб раҳбарияти шундай қарорга келган экан, демак, бунга етарли сабаб бор.

- Максим Шацких билан учрашмадингизми?

- Йўқ. Лекин уни кўрдим. Айни пайт­да Максим «Динамо»нинг U-19 жамоа­сига мураббийлик қиляпти. Биз шуғулланаётган майдонга яқин жойда у ҳам шогирдлари билан машғулот ўтказаётган экан. Уни олисдан кўрдиму, лекин юзма-юз кўришиш насиб қилмади. Балки эрта-индин кўришиб қоларман. Йиғинимиз энди бошланди-ку!

- Бундан бир ой аввал суҳбатлашганимизда, «Тез орада қайси клубда фаолиятимни давом эттиришимга ойдинлик киритиб оламан», деган эдингиз. Бу масала ўз ечимини топдими?

- Ҳали 100 фоиз бир қарорга келмадим. Шу бир ҳафта ичида ҳаммаси аниқ ҳал бўлади.

- «Персеполис»да қолиш имкония­тингизни неча фоизга баҳолаш мумкин?

- Катта эҳтимол билан қолмасам керак. Янги жамоага ўтишим деярли ҳал этилган.

- «Персеполис» дарвозабонига яна жазо қўлланилди. Бу сизга қўшимча имконият эшикларини очади-ку.

- Ҳа, бундан хабарим бор. Лекин кетишимнинг бошқа сабаблари ҳам бор.

- Янги муҳитга мослаша олмадингизми? Балки Эроннинг урф-одатлари сиз ва оилангиз учун ноодатийдир...

- Бунинг сабаблари етарлича. Келинг, бу ҳақда гаплашмаймиз.

- Бошқа клублардан таклифлар етарлича бўлса керак.

- Кам эмас (кулади).

- Балки Ўзбекистон чемпионатига қайтарсиз...

- Билмадим. Аввал айтганимдек, ҳозирча буни инкор ҳам этмайман, тасдиқламайман ҳам. Ҳаммасини вақт кўрсатади. Ким билади, балки «Пахтакор»га қайтарман. Афсуски, собиқ жамоамнинг ўйинлари қовушмаяпти. Биринчи даврада чемпионга хос ўйин намойиш этилмади. Жамоам иштирокидаги ўйинларни кузатиб бордим. Ҳали «Пахтакор» ўзини ўнглаб олишига ишонаман. У иродали жамоа. Иккинчи даврада  умуман бошқа «Пахтакор»ни кўрсак, бундан ажабланмайман.

- Ўзбекистон миллий терма жамоасининг бугунги кундаги биринчи рақамли дарвозабони қайси клубга ўтиши кўпчилик учун қизиқ. Номини айтмасангиз ҳам, лоақал қайси давлат жамоаси эканига ойдинлик киритарсиз.

- Йўқ. Келинг, воқеалар ривожидан илгарилаб кетмайлик. Бунга оз фурсат қолди. 

- Йиғин доирасида ўртоқлик ўйин­лари ташкил этиляптими?

- Ҳали ўтказмадик. Киевга ўзи кеча (суҳбат 3 июль куни уюштирилган) тонг саҳарда келдик. Ҳозирча кунига икки маҳал машғулот билан чекланяпмиз. Адашмасам, сешанба куни маҳаллий клублардан бири билан ўртоқлик учрашувида куч синашадимиз.

Манба: "ИнтерФУТБОЛ" газетасси