Португалия терма жамоаси бош мураббийи Фернанду Сантуш Францияга қарши бўлиб ўтадиган Евро-2016 финал баҳси олдидан ўз фикрлари билан ўртоқлашди.

«Бу икки буюк жамоа ўртасидаги ўйин бўлади. Бу финалга бор эътиборимизни қаратганмиз. Бизнинг стратегиямиз — ғалабага йўл топиш. Франция терма жамоаси Германияга қарши ўйинда ўз маҳоратини намойиш қилди. Улар рақибга нисбатан ҳурмат билан ёндошдилар ва чиройли ўйнаган ҳолда ғалаба қозондилар. Бизга қарши ўйинда французлар бундай режа асосида ўйнамайдилар. Тахминимча, улар ўйинни тажовузкор бошлайдилар ва бизни ўз дарвозамиз олдида қамаб қўйишга ҳаракат қиладилар.

Бизнинг жамоа — ёшлик ва тажриба уйғунлашувидан иборат. Ёш футболчилар бизга майдонда шиддатни бермоқда. Тажрибали футболчилар эса ғалаба қозонишга кўникишган. Барчамиз биргаликда бир ишни қиляпмиз. Шундай руҳда давом этсак, ишни охиригача етказамиз.

Мусобақа бошиданоқ ўзимизга ишонган ҳолда ўйнаяпти. Французлар биз ҳақимизда "Португалия ҳақли бўлмаган ҳолда ғалаба қозонмоқда", дея гапиришда давом этаверсин. Биз эа совринни уйга олиб кетишни истаймиз. Бу Португалия ва Франция ўртасидаги илк финал ҳисобланади. Ишончим комил, Португалия эртанги ўйинда тарих яратади», — дейди Сантуш.