Чили чемпионати старти футболчиларнинг иш ташлашлари туфайли қолдирилди, дея хабар беради ТАСС.
Иш ташлашга маҳаллий футбол федерациясининг лигалараро ўтиш системасига ўзгартириш киритгани сабаб бўлди. Янги қарорга кўра биринчи лигадан фақат бир жамоа тушиб кетади ва олий лигага биргина жамоа чиқади. Шу билан бирга иккинчи ва учинчи лигаларда жамоалар алмашиши бўлмайди.
Чили футболчилар касаба уюшмаси фикрига кўра, бу қарор туфайли юқори лиганинг 120 футболчиси шартномасиз, қуйи лиганинг 300 футболчиси ишсиз қолди. Чили чемпионати яқин дам олиш кунлари бошланиши керак эди. Мусобақанинг янги бошланиш муддати аниқ эмас.
