Мамлакатимиз ёш шахматчилари Эронда ўтказилган мактаб ўқувчилари ўртасидаги Осиё чемпионатида 6 олтин, 3 кумуш ва 2 бронза медални қўлга киритиб, умумжамоа ҳисобида учинчи ўринни эгаллади.

Президентимиз раҳнамолигида болалар спортини ривожлантиришга қаратилаётган доимий эътибор самарасида юртимиз ёшлари халқаро майдонларда улкан ғалабаларни қўлга киритмоқда. Эрондаги Осиё чемпионатида бу яна бир бор намоён бўлди.

Етти ёшгача бўлган ўғил болалар ўртасидаги баҳсларда Алихон Авазхонов 7,5 очко билан олтин медалга сазовор бўлди. Иқтидорли шахматчимиз рапид ва блиц шахмат бўйича ўтказилган баҳсларда ҳам муваффақиятли қатнашиб, иккита кумуш медални қўлга киритди. Рапид йўналишида Ҳумоюн Синдоров биринчи ўринни эгаллади.

Шу ёшдаги қизлар баҳсида Афрўза Ҳамдамова тўққиз имкониятдан 8 очко жамғариб, Осиё чемпиони бўлди, рапид ва блиц турнирларда ҳам тенгдошларига ҳеч қандай имконият қолдирмай, шоҳсупанинг энг юқори поғонасига кўтарилди. Нозима Валиева рапид ва блицда кумуш ва бронза медаль билан тақдирланди.

Блиц йўналишида ўн беш ёшгача бўлган шахматчилар баҳсида Далер Воҳидов биринчи, рапид йўналишида тўққиз ёшгача бўлган ўғил болалар баҳсида Расулбек Абдуллаев учинчи ўринни эгаллади.