Криштиану Роналду футболчилик карьерасини якунлашига вақт бор бўлишига қарамай, ҳақиқий афсонага айланишга улгурди. Криштининг номи билан юритиладиган итдан тортиб, аэропортгача, музейдан тортиб, бутун бир галактикага тенг нарсаларга дуч келишингиз мумкин, деб ёзди «Корреспондент».

Роналду музейи

Камдан-кам спортчи ўзининг шахсий музейи билан мақтана олади. Роналдуга тегишли музей қандайдир бурчакда ёки уйнинг чеккароқ хонасида эмас. У ўзининг ишчиларига ва графикаларига эга экани билан ажралиб туради. Бу музей Роналду туғилиб ўсган Мадейра оролларидаги Фуншал шаҳарчасида жойлашган ва «Museu CR7» деб номланган.

Роналду ёдгорлиги

Ўша Мадейрада Криштиану Роналдуга атаб ёдгорлик ҳам ўрнатишди. Баландлиги 3—4 метрни, оғирлиги эса 800 килограммни ташкил қиладиган бронза ҳайкал Фуншал шаҳарчасида қад ростлаган.

Лионель Месси «Олтин тўп»ни қўлга киритган куни ёдгорлик тагига аргентиналик футболчининг футболка рақами ҳамда исм-шарифи ёзиб кетилди. Бундан жаҳли чиққан Криштиану ўзига атаб ўрнатилган ҳайкални ўз музейига кўчиришга қарор қилди.

Роналду отели

Криштиану Роналду ва Pestana Hotel Group ҳамкорликда шинам отелга ҳам асос солишди. Меҳмонхонанинг биринчиси эндиликда сизга маълум бўлган Фуншал шаҳрида ишга тушди. «CR7» меҳмонхонасининг кейинги иккитаси Лиссабон ва Мадридда иш бошлаши режалаштирилган. 2018 йилга келиб эса бундай маконни Нью-Йоркдан ҳам топиш мумкин бўлади.

Роналду номли аэропорт

Криштиану Роналдунинг Фуншал шаҳарчасига сўнгги ташрифи чоғида Мадейра ороли раҳбари Мигел Албукерке ҳудудга тегишли аэропортни «Криштиану Роналду номидаги Мадейра аэропорти» деб номлашга буйруқ берди. Бунинг учун футболчи Twitter саҳифасида миннатдорчилик билдиришни унутмади.

Роналду учун аталган самолёт

Бутун бошли аэропорт бўлганидан кейин, самолёт бўлмасинми? Ryanair авиакомпанияси ўзининг учар аппаратларидан бирига Криштининг номини беришга қарор қилди. Энди бу самолёт Ryanaldo деб номланган.

Роналду номи билан аталган галактика

Нуэва де Лиссабон университети олимлари ўзлари кашф қилган галактикани Криштиану Роналдунинг номи билан боғлашди. «CR7» номи билан юритилаётган галактика Қуёшдан триллион марта ёрқинроқ экани айтилган.

Роналду пудели

Итларнинг жаҳонга донғи кетган кўргазмаси «Crufts Dog Show»да Роналду номи билан юритилувчи ит зоти 3-ўринни қўлга киритди. Пудел британиялик Дебби Элрикка тегишли бўлиб, португалиялик футболчи каби фойдали экани айтилган. Тўғри, Роналду бор йўғи 3-ўриндан ҳеч қачон хурсанд бўлмасди…

Роналдунинг ўғли

Футболчининг зурриёдини ҳам унутмаслик керак. Ўғил отасининг шарафига Криштиану-кичкина деб юритилади.