«Ювентус» ҳужумчиси Душан Влахович фаолиятини Турин клубида ёки «Барселона»да давом эттириш ниятида.

Сербия терма жамоасининг 26 ёшли форварди жароҳати сабабли ноябрь ойининг охиридан бери майдонга тушмаяпти. У А Сериянинг 27-туридан ўрин олган ва 1 март куни бўлиб ўтадиган «Рома»га қарши ўйинда иштирок этишни режалаштирган.

Душаннинг Турин клуби билан шартномаси 30 июнгача мўлжалланган бўлиб, футболчи келишувни узайтириш имкониятини инкор этмаяпти. Tuttosport нашрининг хабарига кўра, у барча вариантларни баҳоламоқда ва энг асосийси — «Ювентус»да қолиш.

Сербиялик футболчи «бьянконери» раҳбарияти унга қандай шартлар таклиф қилиши мумкинлигини тушуниш учун клуб раҳбарлари билан учрашув сўраган.

Агар клубдан кетиш муқаррар бўлса, Влахович учун асосий вариант — «Барселона» бўлади. Шунингдек, ҳужумчига «Милан» ва АПЛ клублари ҳам қизиқиш билдиришган.

Влахович жорий мавсумда А Сериянинг 13 та ўйинида 3 та гол урди ва 1 та голли узатмани амалга оширди.