«Барселона» бош мураббийи Ханс-Дитер Флик жамоаси Испания Ла Лигасининг 24-турида «Жирона»га 1:2 ҳисобида мағлуб бўлганидан сўнг машғулот майдонида футболчилар билан бир соатлик учрашув ўтказди. Бу ҳақда Mundo Deportivo хабар берди.

Мазкур учрашувда мутахассис жамоа йўл қўйган хатоларни таҳлил қилди ва ўз ўйин услубидан воз кечмаслигини таъкидлади. Унинг асосий устувор вазифаси — ўйин услубини ўзгартириш эмас, балки жамоанинг аввалги интенсивлигини қайта тиклашдан иборат. Флик, агар футболчилар майдонда тўғри жойлашса ва юқори прессинг қўлласа, рақиб «Атлетико» яратганчалик кўп вазият ярата олмаслигини қайд этган.

Эслатиб ўтамиз, «Барселона» бундан аввал Испания Кубоги ярим финалининг илк учрашувида «Атлетико»га 0:4 ҳисобида мағлуб бўлган эди.