“Бунёдкор” – “Металлург” учрашувидан кейинги матбуот анжуманининг иккинчи қисмида бекободликлар устози қатнашди.

- Яхши ва чиройли ўйин бўлди. Бундай томошабоп учрашувлар мухлисларга ёқади. Одатда кубок ва чемпионат учрашувларининг фарқи бўлади. Кубок доирасидаги биринчи учрашувда меҳмонда ўйнаётган жамоа асосий эътиборини ҳимояга қаратади. Биз дастлабки дақиқаларда “Бунёдкор”нинг ҳужумларини бартараф этдик. Бироқ Ҳамдамовнинг узоқ масофадан киритган голи бизни режаларимизни ўзгартириб юборди. Умуман 3:1 ҳисобини жавоб учрашуви олдидан ёмон натижа демаган бўлардим. Агарда ҳисоб 2:1 бўлиб турган паллада Ислом Қобилов йўллаган зарба гол бўлганида балки дуранг бўларди. Зуҳуровнинг тажрибаси “Бунёдкор”га қўл келди. У тўпни эгаллаб олиб, тезкор қарши ҳужум бошлади ва бу вазиятда мезбонлар учинчи голини уришди. Гадоевнинг мана шундай тезкор ҳаракатлари борлигини билардик. Бироқ уни тўхтатиб қололмадик, - дейди Шавкат Саидов.