Россия Премьер-Лигасида 2016/17 йилги мавсум 30 июль санасидан расман старт олди ва 1 август куни 1-тур беллашувлари тўлиқ якунланди.

«Спорт-экспресс» нашрига кўра, Россия клубларининг сафарда тўп сурганлари тарихда биринчи бор 1 та турда умуман гол ура олмади. 1993 йилги мавсумнинг 10-турида меҳмон жамоалар умумий 1 дона гол урган бўлса, орадан бир йил ўтиб Россия чемпионатининг 9-турда бу ҳол такрорланганди.

2016/17 йилги мавсумнинг 1-туридан жой олган 8 та беллашувнинг 3 тасида 0:0 ҳисоби қайд этилди ва қолган 5 тасида мезбон клублар қуруқ серияли ғалабани қўлга киритди.

Ўзбекистонлик футболчи Одил Аҳмедов тўп сураётган «Краснодар» мавсумни йирик ғалаба билан бошлаб, «Томь» клубини 3:0 ҳисобида мағлуб этди. Ўзбекистон миллий терма жамоаси сардори 31-дақиқага келиб майдонга туширилди ва шундан кейин унинг жамоадошлари 3 та гол уришга муваффақ бўлди.

Виталий Денисов тўп сурадиган «Локомотив» эса Санкт-Петербургда «Зенит» билан 0:0 ҳисобида дуранг ўйнади. Ўзбекистонлик футболчи беллашувда тўлиқ ҳаракат қилди.

Россия Премер-Лигаси
1-тур беллашувлари

«Зенит» — «Локомотив» 0:0
«Анжи» — «ЦСКА» 0:0
«Ростов» — «Оренбург» 1:0
«Урал» — «Уфа» 2:0
«Спартак» — «Арсенал» 4:0
«Терек» — «Криля Советов» 1:0
«Рубин» — «Амкар» 0:0
«Краснодар» — «Томь» 3:0