Рио-де-Жанейро Олимпиадасининг очилиш маросимига икки кун қолганида аёллар ўртасидаги футбол турнири старт олди ва унинг доирасида олти беллашув ўтказилди.

Биринчи учрашувда Швеция терма жамоаси ЖАР қизларига қарши майдонга тушди ва 1:0 ҳисобида муваффақият қозонди. Шу гуруҳдаги иккинчи учрашувда эса мезбон — Бразилия терма жамоаси Хитойга ҳеч қандай имконият қолдирмади — 3:0.

Иккинчи гуруҳда Германия терма жамоаси Зимбабвени 6:1 ҳисобида мағлуб этган бўлса, канадалик футболчи қизлар Австралиядан устун келди — 2:0.

Учинчи зонада АҚШ ва Франция терма жамоалари 3 очкодан қўлга киритди. Америкалик қизлар Янги Зеландияни 2:0 ҳисобида мағлубиятга учратган бўлса, Колумбия Францияга қаршилик қила олмади — 0:4.

Бугун — 4 август куни Рио—2016 да эркаклар футболи турнири старт олади.