Қашқадарёда “Гўзал ва бетакроримсан, муқаддас Ватаним, жоним сенга фидо, Ўзбекистоним!” шиори остида ҳаваскор футболчилар ўртасида республика мини-футбол мусобақасининг минтақавий босқичи ўтказилди.

Ўзбекистон “Адолат” социал-демократик партияси сиёсий кенгаши ташаббуси билан қатор ташкилотлар ҳамкорлигида ташкил этилган мусобақада Қашқадарё, Сурхондарё, Бухоро ва Навоий вилоятлари жамоалари баҳслашди.

Президентимизнинг шу йил 2 июндаги “Ўзбекистон Республикаси давлат мустақиллигининг йигирма беш йиллик байрамига тайёргарлик кўриш ва уни ўтказиш тўғрисида”ги қарори ижроси доирасида ташкил этилган мусобақада мамлакатимизда спортни оммавийлаштириш орқали оилаларда соғлом турмуш тарзини қарор топтириш, жисмоний бақувват ва юксак салоҳиятли авлодни вояга етказишга алоҳида эътибор қаратилаётгани таъкидланди.

Қашқадарё вилояти жамоаси биринчи ўринни эгаллади ва мусобақанинг мамлакат босқичида қатнашиш ҳуқуқини қўлга киритди. Иккинчи ва учинчи ўринларга Навоий ҳамда Бухоро вилояти жамоалари сазовор бўлди.

– Ўзбекистон “Адолат” социал-демократик партиясининг бошланғич ташкилоти фаолиман, – дейди Қашқадарё вилояти жамоаси сардори Ш.Рўзиқулов. – Бўш вақтимизда кўпроқ спорт билан шуғулланамиз. Бунинг учун шаҳримизда барча шароит яратилган. Бу нафақат соғлигимиз учун фойдали, балки ишимизда самарадорлик ошишига ҳам ёрдам бермоқда.