Кеча вазни 66 килограмгача бўлган дзюдочилар беллашувида Ришод Собиров бронза медалани қўлга киритиб делегациямиз ҳисобига иккинчи медални тақдим этгани хақида ҳабар бергандик. Ўз навбатида ушбу соврин Ришод учун Олимпия ўйинларида қўлга киритилган учинчи медаль бўлди.      Бир ойдан сўнг 30 ёшни қаршилайдиган хамюртимиз бунга қадар 2008-йили Пекин ҳамда 2012-йили Лондондаги Олимпия ўйинларида ҳам делегациямиз ҳисобига бронза медалларини қўшиб қўйганди. Ана шу тариқа Ришод Олимпия ўйинларининг учта медалига сазовор бўлган ер юзидаги бешинчи дзюдочига айланди.      Шу бугунга қадар Олимпия ўйинларининг учта медалини қўлга киритган бор йўғи тўрт нафар дзюдо усталари бор эди. Булар Япониялик Тадахиро Номура (дзюдо бўйича ягона уч карра Олимпия ўйинлари чемпиони), голландиялик Марк Хойцинга (битта олтин, иккита бронза), шунингдек франциялик икки дзюдочилар Анжело Паризи (1-2-1, битта Олимпия ўйинларида ўз ҳисобига иккита медал қўшиб қўйган ягона дзюдочи) ва Давид Дуйе (2-1-0).      Демак, эндиликда ушбу буюк спортчилар қаторида Ўзбекистонлик Ришод Собиров номи ҳам зикр этилади. Фаолияти давомида икки карра жаҳон чемпиони, уч карра Олимпия ўйинларининг совриндори бўлиш ҳар бир профессионал спортчининг орзуси ҳисобланади.      Шукрки бизда эса бундай спортчилар етарлича топилади. Артур Таймазов фаолияти давомида эркин кураш бўйича Олимпия ўйинларининг учта олтин ва битта кумуш медалларига сазовор бўлди. Ушбу натижалари эвазига Артур хақли равишда жахон спорти тарихидаги буюк спортчилар қаторидан ўрин олди.      Яна бир ҳамюртимиз Оксана Чусовитина 41 ёшида ҳам бутун гимнастика дунёсини зир титратмоқда. Ахир қайси спорт гимнастикачисининг профессионал фаолияти 26 йил давом этган? Ким спортнинг ушбу турида Олимпия ўйинларининг хам олтин, хам кумуш медалларига эга бўлиб, уч карра жаҳон чемпионлигига эришган, хам Европа чемпионлиги, хам Осиё ўйинларининг икки карра олтин медалларини тантана қилган?        Ҳозирда бутун дунё спорт гимнастикаси мухлису мутахассисларини қизиқтираётган мавзу, қандай қилиб еттита Олимпия ўйинларида иштирок этиш мумкин деган савол бўлмоқда. Ишонинг, бундай спортчи бор ва у бизнинг, ўзимизнинг Оксана! Унинг Рио-де-Жанейрода қандай натижа қайд этишининг аҳамияти унчалик ҳам катта эмас аслида. Боиси у бугун жаҳон спортининг афсонасига айланиб бўлди.       Шу ўринда хақли савол туғилади. Хўш, ўзбекистонлик спортчиларнинг жаҳон ареналарида бу қадар самарали ва муваффақиятли иштирокларининг сабаби нимада? Бунинг барчаси мамлакатимизда спортга, хусусан болалар спортига Давлатимиз ва Ҳукуматимиз томонидан кўрсатилаётган юксак эътибор натижасидир. Мустақил давлатимиз эндигина 25 ёшга тўляпти. Тарихан қисқа даврда биз ана шундай натижаларга эришиб, бутун дунёни хайратга солаётган эканмиз эллик, юз йиллардан кейин қандай муваффақиятларга эришишимиз мумкинлигини тасаввур қилиб кўринг. Бизда спортга Давлат даражасида эътибор қаратилар экан ўзбеклардан янги янги чемпионлар, Олимпия ўйинлари ғолиблари, бутун дунёни зир титратадиган полвонлар етишиб чиқаверади. Бунга шак шубҳа йўқ!     Зафар Имомхўжаев   Фото: Анвар Ильясов   Шавкат Жалилов