Осиё чемпионлар лигасининг чорак финал ўйинлари бошланишига оз вақт қоляпти. 23 август куни "Локомотив" ОЧЛнинг 1/4 финал доирасида дастлабки учрашувни ўтказади. "Темирйўлчилар" сафарда "Ал Айн"га қарши баҳс олиб боришади. Хўш, бу жамоа "Локомотив" билан бўладиган ўйинга қандай тайёргарлик кўрмоқда?

Аввало шуни айтиш лозим, БААда ҳали миллий чемпионат бошлангани йўқ. Шу боис "Ал Айн" ҳозирча фақат ўртоқлик учрашувлари ўтказиш орқали бўлажак беллашувга тайёргарлик олиб боряпти. Жамоа дастлаб Австрияда йиғин ўтказди ва у ерда иккита ўртоқлик баҳсида майдонга тушди. Иккала ўйин ҳам Италия клублари билан кечди. "Удинезе" - "Ал Айн" 3:0 ва "Болонья" - "Ал Айн" 2:0.

Жамоа Австриядан қайтиб келгач, дастлаб футболчиларга дам берилди ва кейин эса машғулотлар яна давом эттирилди. "Ал Айн" кеча Уммоннинг "Ал Сувайқ" клубига қарши ўртоқлик учрашуви ўтказиб, 2:3 ҳисобида мағлуб бўлди. Бу ўйин ёпиқ ҳолда ўтказилгани боис жамоа таркиби ва кимлар гол ургани ҳеч қаерда эълон қилинмаган. "Ал Айн" бугун ҳам ўртоқлик баҳсида майдонга тушади. Рақиб - Уммоннинг бошқа бир жамоаси "Саҳам". Мазкур беллашув ҳам ёпиқ эшиклар ортида бўлиб ўтади.