Гулистонда “Футболимиз келажаги” мусобақасининг ҳудудий финал босқичи ўтказилди. 

“Маҳалла” хайрия жамоат фонди Сирдарё вилояти бўлими, вилоят маданият ва спорт ишлари, халқ таълими бошқармалари, “Камолот” ёшлар ижтимоий ҳаракати вилоят кенгаши ҳамкорлигида ташкил этилган мусобақада туман ва шаҳар босқичларидан сараланган 12 маҳалла футбол жамоаси ғолиблик учун баҳслашди. 

Президентимиз раҳнамолигида маҳаллаларда замонавий спорт мажмуалари барпо этилаётгани ёш авлодни ҳар томонлама баркамол этиб тарбиялаш, уларнинг истеъдод ва салоҳиятини юзага чиқаришда юксак самаралар бермоқда. “Футболимиз келажаги” мусобақаси ҳам маҳалла ёшларининг бўш вақтини мазмунли ташкил этиш, улар ўртасида футболни янада оммалаштиришга қаратилгани билан аҳамиятлидир. 

– Ҳар қандай мусобақа ёшларнинг спортга қизиқишини янада кучайтириш ва спортнинг оммавийлигини оширишга хизмат қилади, – дейди Гулистон шаҳридаги “Намуна” маҳалла фуқаролар йиғини футбол жамоаси мураббийи Исфандиёр Қурбонов. – Бугунгидек мусобақалар орқали кўплаб иқтидорлар юзага чиқади. Ёшлар бўш вақтини беҳуда ўтказмай, машғулотларга қатнайди, шуғулланади. Қисқача айтганда,соғлом турмуш тарзига риоя қилади, ҳар томонлама баркамол улғаяди. 

Мусобақада 9-10 ёшлилар ўртасида Ховос туманидаги “Истиқлол”, 11-12 ёшлилар ўртасида “Бунёдкор”маҳалла фуқаролар йиғинлари футбол жамоалари биринчи ўринни эгаллади. 13-14 ёшли футболчилар ўртасида ғолиблик Гулистон шаҳридаги “Намуна” маҳалла фуқаролар йиғин жамоасига насиб этди.