Кеча бўлиб ўтган "Локомотив" ва "Сўғдиёна" ўринбосарлари ўртасидаги баҳсда ёш "темирйўлчилар" 3:1 ҳисобида ғалаба қозонишди. Шу тариқа ёшларимиз кетма-кет саккизта ўйиндан иборат ғалабасиз серияга чек қўйишди.

Статистикага назар ташлайдиган бўлсак, ўринбосарларимиз охирги марта уйда "Пахтакор"ни мағлуб этишганди. Шундан сўнг жамоа сафарда "Қўқон-1912"ни мағлубиятга учратди. 11-турдан бошлаб эса ғалабасиз серия бошланди ва бу ҳол 19-тургача давом этди.

Ва ниҳоят "Сўғдиёна" билан кечган беллашувда "темирйўлчилар" уч очкони қўлга киритишди. Биз кейинги ўйинларда ҳам ўринбосарларимиздан ғалабали учрашувларни кутиб қоламиз.