Олимпия ўйинларининг 8 карра чемпиони ямайкалик спринтер Усэйн Болт спортда исботлаши керак бўлган бошқа ҳеч нарса қолмаганини айтиб ўтди. Бундай фикрни у Рио–2016 Олимпиадаси ахборот хизматига маълум қилди, деб хабар бермоқда «ТАСС».

Ямайкалик спринтер Рио–2016 Олимпиадасида 100 (9,81 сония) ва 200 метрга (19,78 сония) югуриш баҳсларида олтин медални қўлга киритиб, саккиз карра Олимпиада чемпионига айланди.

«Мен исботлашим керак бўлган ҳеч нарса қолмади. Буюк эканимни яна нима билан исботлашим мумкин? Мен машҳур футболчи Пеле ва афсонавий боксчи Муҳаммад Али сингари спортчилар қаторида бўлиш учун ҳаракат қиляпман. Умид қиламанки, Риодаги Олимпиададан кейин улардан бирига айланаман», – деди Болт.

Болт, шунингдек, Риодаги Олимпиада унинг фаолиятидаги сўнггиси бўлиши мумкинлигини таъкидлади. «Ўйлашимча, бу менинг сўнгги Олимпиадам», – деди 29 ёшли спортчи.

Усэйн Болт Пекин–2008 ва Лондон–2012 ўйинларида учта йўналишда жами 6 та олтин медалга сазовор бўлганди. 2015 йилги жаҳон чемпионатида ямайкалик учта олтин билан 11 карра жаҳон чемпионига айланганди. Ушбу натижа енгил атлетика тарихида энг яхшиси сифатида қайд этилди.

Болт 100 ва 200 метрга югуриш бўйича амалдаги рекорд соҳиби саналади – 9,58 ва 19,19 сония.