Рио олимпиадасида яна бир боксчимиз финал йўлланмасини қўлга киритди! 64 кг. вазн тоифасида Фазлиддин Ғоибназаров жаҳон чемпиони — Виталий Дунайцевга қарши кечган ўта муросасиз жангда ғалаба қозонди.

Биринчи раунда ринг марказини Фазлиддин эгаллаган бўлса, россиялик спортчи иккинчи рақам остида ишлашга ҳаракат қилди. Ҳакамларнинг баҳолари қизиқ бўлди. Уларнинг икки нафари Дунайцевга, бири эса Ғоибназаровга устунликни тақдим этди.

Иккинчи бўлимда ўзбек боксчиси тўла устунликка эга бўлди ва рақибга кўплаб аниқ зарбалар берди. Ҳакамларнинг барчаси бу сафар Фазлиддиннинг ғалаба қозонганини қайд этди. Учинчи раунд бошланиши олдидан умумий ҳисоб қуйидагича кўринишга келди — 20:18, 19:19, 19:19.

Ҳали ҳеч нарса аниқ эмас эди, ҳисоб хавотирли эди. Юртдошимиз учинчи бўлимда асосан очко учун ишлашга ҳаракат қилди. Чарчоқ остида жаҳон чемпионига қарши ишлаш осон эмас эди. Аммо Ғоибназаров уддалади. Сўнги раунд учун икки ҳакам россиялик боксчига, бир нафари эса ўзбекистонликка ўз овозини берди. Натижада — 2:1 (29:28, 28:29, 29:28). Фазлиддин финалда!

Шу тариқа, Ғоибназаров ўтган йили Қатарда ўтган жаҳон чемпионати финалидаги мағлубият учун Дунайцевдан қасос олишга муваффақ бўлди. Энди у финалда озарбойжонлик Лоренцо Сатомайорга қарши олтин медаль учун кураш олиб боради.

Демак, 20 ва 21 август кунлари бўлиб ўтадиган финал жангларида 3 нафар ўзбекистонлик боксчи — Бектемир Мелиқўзиев (75 кг.), Шаҳобиддин Зоиров (52 кг.) ва Фазлиддин Ғоибназаров (64 кг.) рингга кўтарилишади.