Ўзбекистон терма жамоаси 1 сентябрь куни ЖЧ-2018 учинчи саралаш босқичининг илк ўйинида Сурияни қабул қилади. Сурияликлар ушбу ўйинга тайёргарлик доирасида эртага Хўжанд шаҳрида Тожикистон терма жамоасига қарши ўртоқлик учрашувини ўтказишади. Бугун Сурия терма жамоаси бош мураббийи Айман ал-Ҳаким матбуот анжуманида иштирок этиб, ўз фикрлари билан ўртоқлашди.

"Аввало, биз билан ўртоқлик учрашувини ўтказишга рози бўлган Тожикистон футбол федерациясига миннатдорчилик билдираман. Бизни 1 сентябрь куни Тошкентда Ўзбекистонга қарши ЖЧ-2018 саралаш баҳси кутиб турибди. Тожикистонга қарши ўйин бизга катта фойда беради. Эртанги ўйин мен учун Сурия терма жамоаси бош мураббийи лавозимидаги илк учрашув бўлади. Мен бу баҳсга Ўзбекистон билан ўйинга тайёргарликнинг бир босқичи сифатида қарамоқдаман.

Хўжандга ташриф буюришдан аввал биз деярли бир ой давомида Сурияда тайёргарлик кўрдик. Россияда йиғин ўтказишни режалаштиргандик, афсуски, хорижда йиғин ўтказа олмадик. Тайёргарлик учун бу ерда ажойиб шароитлар яратилганини билганимизда, бу ерга эртароқ келган бўлардик. Эртанги ўйин ФИФА кунига тўғри келмагани боис, биз баъзи легионерларимиз хизматидан фойдалана олмаймиз. Хўжандга етти нафар легионерни олиб келганмиз. Эртага ўз жамоамдан яхши ўйин кутяпман", - дейди Айман ал-Ҳаким.