Ўзбекистон миллий терма жамоаси техник директори Деян Журжевич саралаш баҳсларидаги рақиб – Сурия терма жамоаси иштирокидаги ўйинни кузатиш учун Тожикистоннинг Хўжанд шаҳрига жўнаб кетди.
Жаҳон чемпионати 3-саралаш босқичи 1-тури доирасида Тошкентда Ўзбекистон терма жамоасига қарши майдонга тушадиган Сурия терма жамоаси мазкур ўйинга тайёргарлик жараёнида 27 август куни сафарда Тожикистонга қарши ўртоқлик учрашувини ўтказади.
Таъкидлаш жоиз, саралаш босқичидаги рақибларнинг ўйинлари Самвел Бабаян бош мураббийлигидаги терма жамоа мураббийлари штабида катта қизиқиш уйғотган. Шу боис, миллий терма жамоа техник директори Деян Журжевич 1 сентябрь куни Тошкентда меҳмон бўладиган Сурия терма жамоасининг ўйинини кузатиш ва ўрганиш учун Тожикистоннинг Хўжанд шаҳрига жўнаб кетди.
Эслатиб ўтамиз, Сурия терма жамоаси Жаҳон чемпионати 3-саралаш босқичи илк тури доирасида 1 сентябрь куни Тошкентда Ўзбекистон миллий терма жамоасига қарши майдонга тушади. Мазкур ўйин Тошкентдаги “Бунёдкор” стадионида бўлиб ўтади.
