Вьетнамда қизлар ўртасида Осиё чемпионати U16 саралаш ўйинлари якунига етди. Гуруҳнинг сўнгги ўйинида Австралия қизларига мағлуб бўлган ҳамюртларимиз, гуруҳда учинчи ўринни эгаллаб, кейинги босқичга чиқа олишмади.

Ушбу саралаш гуруҳи ўйинларига Вьетнам мезбонлик қилди. Саралаш турнирининг илк учрашувида айнан мезбон терма жамоага қарши ўйин ўтказган ўзбекистонлик қизлар 1:2 ҳисобида мағлуб бўлди.

Иккинчи учрашувда Фаластин билан 1:1 ҳисобида дуранг ўйнаган Ўзбекистон саралаш турнирининг учинчи ўйинида Гонконгни 2:0, тўртинчи ўйинда Ироқни 4:0 ҳисобларида мағлуб этди.

Учинчи сентябрь куни бўлиб ўтган сўнгги тур учрашувида Ўзбекистоннинг рақиби ушбу саралаш гуруҳининг яққол фаворити – Австралия ўсмир қизлар терма жамоаси бўлди. Барча рақибларини фақат йирик ҳисоблар билан мағлуб этиб келаётган австралияликлар, Ўзбекистон дарвозасига ҳам 9 бора йўл топишди. Бу голларга Ўзбекистон фақат бир бора, Маржона Тўраеванинг голи билан жавоб бера олди– 1:9. Таъкидлаш керакки, дастлабки турда Фаластинни 28:0 ҳисобида мағлуб этган Австралия, якунда 5 ўйинда 65 марта рақиблар дарвозасини ишғол қилиб, фақатгина Ўзбекистон билан учрашувда бир гол ўтказиб юборди.

Ўзбекистон U16 5 ўйинда 7 очко жамғариб, гуруҳда учинчи ўринни эгаллади. Барча рақибларини мағлуб этган Австралия 1-ўрин билан кейинги босқичга йўл олди.

Осиё чемпионати U16 саралаш мусобақаси

5-тур.

Ўзбекистон U16 – Австралия U16 – 1:9

Голлар: Маржона Тўраева (85) – Сакалис (23,38,69), Жасинта (26,31), Христодолу (45), Хикматова (75 автогол), Винье (78), Ростбаккен (90+1)