Хабарингиз бор, Ўзбекистон миллий терма жамоасининг 2018 йили Россияда бўладиган жаҳон чемпионати Осиё минтақаси учинчи саралаш босқичи баҳсларида қатнашиши муносабати билан йигирманчи турдан жой олган «Пахтакор» — «Қизилқум» учрашуви қолдирилган эди. 26 августда ўтказилиши лозим бўлган мазкур баҳс 21 сентябрь куни бўлиши белгиланди.
Натижада «Қизилқум» жамоаси учун тақвимда кичик танаффус юзага келди. Навоийликлар эса бу вақтни бўш ўтказмасликка алоҳида эътибор қаратишди.
«Қизилқум» ПФК раҳбариятининг ташаббуси билан Навоийда ажойиб футбол байрами уюштирилди. 26 август куни «Қизилқум» жамоаси ва Ўзбекистон ёшлар (U-19) терма жамоаси ўртасида ўртоқлик учрашуви ўтказилди. Салкам тўққиз минг мухлис бевосита кузатган бу ўйин Навоийдаги «Ёшлар» спорт мажмуасида бўлиб ўтди.
Гарчи, ўртоқлик учрашувида дуранг (0:0) қайд қилинган бўлса-да, бу ўйин шу йил кузда ёшлар ўртасида бўладиган Осиё чемпионати финал босқичига ҳозирлик кўраётган Ўзбекистоннинг бўлажак олимпиячилари учун ўзига хос синов ҳамда тажриба мактаби вазифасини ўтаб берди.
Чунончи, 2020 йили Токиода бўладиган XXXII ёзги Олимпия ўйинларида айнан шу ёшларимиз юртимиз шарафини ҳимоя қилишлари кутилмоқда. Ўз навбатида бу ўйин навоийлик кўпсонли ишқибозлар учун мамлакатимиз мустақиллигининг 25 йиллик тўйига туҳфа бўлди.
