Бугун, 9 сентябрь куни, Ўзбекистон Футбол Федерацияси анжуманлар залида Ўзбекистон ўсмирлар терма жамоасини Ҳиндистонда бўлиб ўтадиган Осиё чемпионатига кузатиш маросими бўлиб ўтди.
15 сентябрда бошланадиган қитъа биринчилигига Ўзбекистон-16 терма жамоаси, 9 сентябрь тунида гол йўл олади. Шу муносабат билан Ўзбекистон Футбол Федерацияси раҳбарияти ўсмирлар терма жамоаси делегацияси билан учрашди.
Тадбирда Ўзбекистон Футбол Федерацияси президенти Мираброр Усмонов, Ўзбекистон Футбол Федерацияси бош котиби Сардор Раҳматуллаев, ЎФФ терма жамоалар маркази раҳбари Асқар Толибжонов, Ўзбекистон миллий терма жамоаси бош мураббийи Самвел Бабаян ва Ўзбекистон U-16 делегацияси иштирок этди.
Тадбир аввалида Ўзбекистон ўсмирлар терма жамоаси бош мураббийи Темур Олимхўжаев сўзга чиқиб, жамоанинг турнирга қай тарзда тайёрлангани, футболчиларни танлаб олиш жараёни, ўтказилган йиғинлар ва ўртоқлик учрашувлари тўғрисида маълумот бериб, бўлажак турнирда жамоа энг юқори вазифаларни бажаришга тайёр эканини билдирди.
Мураббийдан сўнг жамоа сардори – Остон Ўрунов ҳамда жамоанинг яна бир футболчиси – Ислом Каримов ҳам сўзга чиқиб, жамоа Ватан шарафини муносиб ҳимоя қилишга тайёр эканини таъкидлади.
Жамоа аъзоларидан кейин ЎФФ президенти муҳим турнир олдидан ўсмирлар терма жамоасига ўз тилакларини билдирди.
“Ҳозир қўлга киритилаёган ютуқлар ўзгача аҳамиятга эга. Сизларнинг ҳаммангиз мустақиллик фарзандларисизлар. Мустақил юртда туғилиб, вояга етяпсизлар. Мана шу юрт, оғир жудоликни бошдан кечирди. Мана шундай вазиятда, Ватан шарафини ҳимоя қилииш учун майдонга тушаётганингизни ҳис қилиб турсангиз – ҳаммаси яхши бўлади. Миллий терма жамоани кўрдинглар. Учинчи босқич энди бошланди. Жамоа ўйини ҳали мукаммал бўлмаслиги мумкин. Лекин улар ҳозир халқимиз учун ғалабалар қанчалик муҳим эканини англаган ҳолда майдонга тушишди ва ғалабаларга эришишди.
Ўзинглар ҳам айтиб ўтганинглардек, сизлар ҳеч кимдан кам эмассиз. Мамлакатнинг шу ёшдаги энг сара футболчилари сифатида танлаб олиндинглар, Осиё чемпионатига йўлланмани қўлга киритдинглар, тайёргарлик жараёнини ўтказдинглар. Энди ортингизда Ўзбекистон халқи турганини ҳис қилиб, майдонга тушсангиз бўлди. Жаҳон чемпионати йўлланмасига ҳам, чемпионликка ҳам эриша оласизлар шунда. Омад тилайман!” – дея ЎФФ президенти жамоа футболчилари ва мураббийлар штабига бўлажак мусобақа олдидан муваффақият тилади.
Шундан сўнг, Ўзбекистон миллий терма жамоаси бош мураббийи Самвел Бабаян, ЎФФ бош котиби Сардор Рахматуллаев ҳамда ЎФФ терма жамоалар маркази раҳбари Асқар Толибжоновлар ҳам сўз олиб, жамоа делегациясига бўлажак Осиё чемпионатида муносиб иштирок этишларини тилашди. Айнан мана шу ёш вакиллари ўртасида Ўзбекистон Осиё чемпиони бўлиб улгургани ва ана шу натижани ушбу жамоа ҳам такрорлай олишига ишонишларини билдиришди.
Эслатиб ўтамиз, Ўзбекистон ўсмирлар терма жамоаси Осиё чемпионатидаги иштирокини 17 сентябрь куни Таиландга қарши ўйин билан бошлайди. Гуруҳ босқичида, шунингдек, Шимолий Корея ҳамда Яман тўсмирлар терма жамоалари Олимхўжаев бошчилигидаги жамоага рақиблик қилади.
