“Насаф”-“Бухоро” 3:0 учрашувидан сўнг, ўйин яунларига бағишланган матбуот анжумани бўлиб ўтди. Матбуот анжуманининг дастлабки қисмида “Бухоро” жамоасининг бош мураббийи Жамшид Саидов иштирок этди ва ўйин ҳақидаги фикрларини билдирди.

-Ўйин ҳақида нима ҳам дердим, йўл қўйган хатоларимиз эвазига мағлуб бўлдик. “Насаф” билан ўтказган бу учрашувимизда ҳам ўйинчимиз жароҳат олди ва уни алмаштирдик, шундан сўнг дарвозамиздан иккита гол ўтказиб юбордик. Бу мағлубиятдан тегишли хулосаларни чиқарамиз. Ўз ўрнида бугунги ўйинга ташриф буюрган мухлисларимизга алоҳида ташаккур билдираман.

“Насаф”ни қандай ўргандик? Жорий футбол мавсумида биз ўзаро учинчи ўйинни ўтказдик. Ҳар икки жамоа ҳам бир-бирини имкониятини ва салоҳиятини яхши билади. Биз ҳам шундай қараб ўтирганимиз йўқ. “Насаф”га қарши етарлича тайёргарлик кўргандик.

Жамоамиз бу йил деярли янгидан тузилди, бу жамоага ўйинини топиши учун вақт талаб этади. “Насаф” эса аллақачон ўз ўйинини топиб олган, улар мана бир неча йилдирки, барқарор ўйин намойиш этиб келмоқда. Ўйлайманки, биз ҳам келаси йилдан бошқача ўйин кўрсатамиз.

Биз энди навбатдаги ўйинга тайёргарлик кўрамиз. Хатоларимиз устида ишлаймиз.