«Бавария»нинг собиқ дарвозабони Оливер Кан жамоа сардори Филипп Ламга футболчилик фаолиятини якунлаш билан «Бавария» раҳбариятида иш бошламасликни тавсия қилмоқда. 

Лам фаолиятини якунлаганидан сўнг, клуб раҳбариятидан ишлаш истагида эканини бир неча бор таъкидлаган, клуб ҳам унинг истагини қўллаб-қувватлашини билдирган. 

«Мен ҳеч кимга футболчилик фаолиятини якунлаши билан клубдаги ишга ўтишни маслаҳат бермайман. Озгина танаффус олиш керак, шундан кейин аслида нимага қодирлигингни тушуниб оласан», — деди Кан. 

«Тобора мураккаблашиб бораётган спорт бизнеси соҳасида аввал малакани ошириб олиш жуда муҳим аҳамиятга эга. Йўқса, муваффақиятсизликка учрашинг турган гап», — дея қўшимча қилди Оливер Кан. 

Маълумот учун, Филипп Ламнинг «Бавария» билан амалдаги шартномаси 2018 йилга қадар амал қилади.