Сўнгги пайтларда салбий натижалар қайд этиб, мухлисларни чуқур изтиробга солиб қўйган “Андижон”нинг турнир жадвалида эгаллаб турган ўрни айни дамда маҳаллий ишқибозларни сира қониқтирмаётгани бор гап.

Таркибида етарлича маҳоратли ўйинчиси бўлган “бургутлар”нинг сафарда “Машъал”га йирик – 5:0 ҳисобида мағлуб бўлгани тан олиш керак, мухлисларни ранжитди ва улар бундан жуда қайғуда. Кеча жамоанинг “Соғлом авлод” стадионида кечган мшғулотига ташриф буюрган ашаддий ишқибозлар у ерда бевосита футболчилар билан очиқ мулоқотда бўлди.
Ўйинчилар номидан Анвар Бердиев ва Рўзимбой Аҳмедов сўз олиб охирги пайтларда жамоа қайд этаётган натижа чиндан ҳам мухлисларни қониқтирмаслигини билдириб, келгуси ўйинларда ишқибозларни хурсанд қилишга бор куч ва ғайратини ишга солишликни айтиб ўтди. Жамоа ва футболчилар ўртасида моддий жиҳатдан қарздорликлар йўқлиги билдирилди. Шундай экан майдонга чиқиб, борини бериб ўйнаш қолгани айтилди. Афсуски сўнгги пайтлардаги салбий натижалар нафақат мухлисларни балки энг аввало жамоа кайфиятига ҳам жиддий таъсир қилаётганини, ва нима учун бундай бўлаётгани очиғи ўзлари учун мавҳум эканлигини футболчилар ҳам таъкидлашди.

Эслатиб ўтамиз, 1 октябрь шанба куни “Андижон” ўз майдонида Навоийнинг “Қизилқум” жамоасини қабул қилади. Учрашув соат 16:00да бошланади.