Футбол бўйича Европа Чемпионлар Лигаси учрашувлари учун чиқариладиган чипта нархлари бўйича Туриннинг «Ювентус» клуби биринчи бўлиб олди.

«Кекса сенёра»нинг уй учрашувини кўриш мухлислар учун камида 39 фунтга тушади. Бу таҳминан 50 АҚШ долларини ташкил қилади.

Чипталарнинг қимматлиги бўйича Испаниянинг «Барселона» клуби иккинчи бўлди. «Камп Ноу» стадионида Чемпионлар Лигаси учрашувини томоша қилиш бир мухлис учун 38 фунтга тушади.

Рўйхатда «Арсенал» 37, «Лестер» 35, «Севилья», «Наполи», «Атлетико», «Бешиктош» клублари 34 фунтдан чипта сотиши кўрсатилган. Бу кўрсаткич «Реал»да 30, «Боруссия Дортмунд»да 27, «Бавария»да 26, «Манчестер Сити»да 25, «ПСЖ» ва «ЦСКА»да 24 фунтни ташкил қилади.

Энг арзон чипта Киевнинг «Динамо»си ўйинини кўриш учун чиқарилади. Украина чемпионининг халқаро майдондаги учрашувини томоша қилиш учун 4 фунт тўлашнинг ўзи кифоя. «Ростов»да бу кўрсаткич 7 фунтга тенг.