Ҳар иккала жамоага ғалаба сув ва ҳаводек зарур бўлгани учун томонлар илк дақиқалардан олдинга ташланишди. Эронга қарши бўлган ўйиндан фарқли ўлароқ, йигитларимиз рақибнинг ҳамласидан довдираб қолишмади. Хитойликларнинг ҳужумини бартараф этган заҳоти жамоамиз дарҳол олдинга қараб ўта бошладилар.
Баҳснинг 32-дақиқасида терма жамоамизда ажойиб имконият юзага келди. Одил Аҳмедов чап қанотда бир ҳимоячидан ўтиб кетиб, жарима майдончасига кирди ва Сергеевга узатма берди. Игорь 6-7 метрдан тўпни тўхтатмасдан зарба берди. Дарвозабон эса оёғи билан тўпни қайтаришга муваффақ бўлди.
Биринчи бўлим юқори суратларда остида кечди, унда жамоамиз битта голли вазиятга эга бўлди, аммо ундан фойдалана олмади.
Иккинчи бўлимда эса футболчиларимиз рақибни бутунлай таслим этишга муваффақ бўлишди. Иккинчи бўлим бошланганига 5 дақиқа ўтар-ўтмас жамоамиз ҳисобни очди. Сергеев рақиб ҳимоячиларидан тўпни олиб қўйди ва Шомуродовга узатма берди. Элдор жарима майдончасига кираётган Бикмаевга пас берди. Маратнинг зарбасидан кейин тўп олис устунга тегиб, тўрга бориб тушди, 1:0.
Орадан 3 дақиқа ўтиб, Ўзбекистон иккинчи голни уришига бир бахя қолди. Аҳмедов узатма қабул қилган Сергеев 13 метрлардан чап оёқда зарба берди. Тўп устунга тегиб қайтди. Умуман олганда, ўйин давомида тўп Хитой дарвозаси устуни ва тўсинига 3 марта текканини алоҳида таъкидлаш лозим. Орадан 4 дақиқа ўтиб Денисовнинг 30 метрлардан йўллаган зарбасидан кейин тўп тўсинга тегиб қайтди.
Ўйиннинг сўнгги 20 дақиқасида Хитой босим ташкил қилишга ҳаракат қилган бўлса, терма жамоамиз бутун жамоа бўлиб ҳимояланди, тўпни назорат қилишга уринди. Захирадан майдонга туширилган Отабек Шукуров нафақат майдон марказини мустаҳкамлади, балки гол уришга ҳам муваффақ бўлди. Ўйин тугашига 5 дақиқа қолганида ярим ҳимоячининг 22 метрлардан зарбасидан кейин тўп ҳимоячининг оёғига тегди ва дарвоза бурчагига бориб тушди, 2:0!
Орадан 3 дақиқа ўтиб, Жалолиддин Машариповнинг жаримадан зарбаси устунга тегиб қайтди. Қайтган тўпга Тўхтахўжаев 10 метрдан зарба берди. Бу сафар Йанг Жи эгаллаб олди.
Ўзбекистон терма жамоаси чиройли ғалабани қўлга киритди ва ўз очколарини 9тага етказиб олди.
ЖЧ-2018 саралаш. Осиё, 3-босқич. "А" гуруҳи, 4-тур
ЎЗБЕКИСТОН - ХИТОЙ - 2:0 (0:0)
Голлар: Марат Бикмаев (50), Отабек Шукуров (85)
Огоҳлантиришлар: Ислом Тўхтахўжаев (39), Сервер Жепаров (70)
Ўзбекистон: 21.Александр Лобанов, 20.Ислом Тўхтахўжаев, 2.Егор Кримец, 19.Виталий Денисов, 13.Даврон Ҳошимов, 7.Азиз Ҳайдаров, 9.Одил Аҳмедов (Жалолиддин Машарипов 80), 8.Сервер Жепаров, 4.Марат Бикмаев (Отабек Шукуров 64), 23.Элдор Шомуродов (Сардор Рашидов 90), 11.Игорь Сергеев.
Хитой: 23.Йанг Жи, 2.Рен Ханг, 5.Ду Вей, 6.Фенг Сиаотинг, 7.Ву Лей, 8.Цай Хаиканг, 11.Хао Жунмин, 13.Жао Мингжиан, 14.Сун Ке (Жианг Жипенг 18), 18.Гао Лин, 19.Жианг Нинг (Хуан Бовенг 69)
Бош ҳакам: Хеттикамканамге Перера (Шри Ланка)
