Италия Миллий Олимпия қўмитаси 2024 йилги Олимпиадани ўтказиш учун баҳслардан Римни чиқариб юборди. Бу ҳақда, Reuters’га асосланиб, «ТАСС» хабар бермоқда.
Мамлакат Олимпия қўмитаси раҳбари Жованни Малагонинг сўзларига қараганда, бугун, 11 октябрь куни Халқаро олимпия қўмитасига мактуб йўлланиб, Италиянинг даъвогарлик аризаси қайтариб олинган.
21 сентябрь куни Римнинг янги сайланган мери, мухолиф «‘5 юлдуз’ ҳаракати» вакиласи Виржиния Ражи Италия пойтахти 2024 йилги Ўйинларни ўтказишга даъвогарликдан воз кечишини маълум қилди. Қарор шаҳар кенгашида ратификациядан ўтди.
Малаго мернинг рад жавобидан сўнг бу борада ҳеч қандай қадамлар ташланмаслигини, «Италия нуфузини йўқотган»и ва «ишончга эга эмас»лигини айтди. Мамлакат бош вазири Маттео Ренси эса «Олимпиада партияси ёпилди», деб таъкидлади.
2024 йилги Олимпиада ташкилотчиси бўладиган шаҳар 2017 йил 13 сентябрь куни Перу пойтахти Лимада эълон қилинади. Даъвогар шаҳарлар — Лос-Анжелес, Париж ва Будапешт.
