Америкалик сузувчи Майкл Фелпс ва модель Николь Жонсон шу йил июнида яширин равишда никоҳдан ўтди. Бу ҳақда «ТАСС» хабар бермоқда.

Arizona Republic нашрига кўра, спортчи ва собиқ «Калифорния гўзали» 13 июнда, Жонсон ўғил фарзанд кўрганидан бир ой ўтиб, турмуш қурди. Газета тўй Парадайз Вэллида (Аризона штати) бўлиб ўтганини кўрсатувчи никоҳ гувоҳномаси нусхасини чоп этди. На Фелпс, на Жонсон бу ҳақда жамоатчиликка ҳеч нарса маълум қилмади.

Маълумот учун, 31 ёшли Фелпс Рио-де-Жанейродаги ўйинлардан сўнг фаолиятини якунлаши ҳақида эълон қилди. У 5 Олимпиадада иштирок этган ва рекорд даражадаги (23 олтин, 3 кумуш ва 2 бронза, жами 28 та) медалларга сазовор бўлган.