Чемпионлар лигасининг 4-турида «Манчестер Сити» ўз майдонида «Барселона» клубини қабул қилди.

Қизғин курашларга бой ўйин голларга ҳам бой бўлди. Дастлабки дақиқаларда мезбонлар кўпроқ ҳужум қилишди, аммо «Барселона» яхши ҳимояланиб, қарши ҳужумларда хавфли ўйнади.

21-дақиқада шундай ҳужумларнинг бирида меҳмонлар рақибни жазолай олишди. Неймар катта тезликда чап қанотдан жарима майдонига яқинлашди ва тўпни марказдан кириб келаётган Мессига етказди. Ҳужумчи эса икки ҳимоячидан орасидан ўтиб кетди ва дарвозабон билан юзма-юз қолган вазиятда тўпни пастки бурчакка аниқ йўллади.

39-дақиқада ҳисоб тенглашди. Агуэро тўпни Стерлингга оширди. Рахим ўнг томондан жарима майдонига ёриб кирди ва тўпни чапдан келаётган Гюндоганга етказди. Илкай эса яқин масофадан тўпни дарвозага аниқ йўллаб, ҳисобни тенглаштирди.

51-дақиқада Кевин де Брёйне чамаси 24 метр масофадан белгиланган жарима зарбасини қойилмақом тарзда амалга ошириб, жамоасини олдинга олиб чиқди.

74-дақиқада ўнг қанотдан жарима майдонига кириб келган Навас тўпни марказга, Агуэрога етказди. Бироқ у тўпни дарвозага йўллай олмайди ва тўп рикошет билан Гюндоганга келиб тушди. Илкай эса яқин масофадан дарвозани осонлик билан ишғол этиб, ҳисобдаги фарқни оширди.

Ўйин охирига қадар бу натижа ўзгармай қолди ва "Ман Сити" "Барселона"дан ўтган турдаги мағлубият аламини олди.

ЕЧЛ, 4-тур
Манчестер Сити Англия – Барселона Испания 3:1 (1:1)
Голлар: 0:1 – 21 Месси, 1:1 – 39 Гюндоган, 2:1 – 51 де Брюйне, 3:1 – 74 Гюндоган.
Манчестер Сити – Кабальеро, Отаменди, Коларов, Сабалета, Стоунз, де Брюйне (Нолито, 89), Фернандиньо (Фернандо, 60), Гюндоган, Стерлинг (Навас, 71), Сильва, Агуэро.
Барселона – тер Стеген, Суарес, Умтити, Динь, Бускетс, Маскерано, Ракитич (Туран, 61), Серджи Роберто, Андре Гомеш (Рафинья, 77), Неймар, Месси.
Огоҳлантиришлар: Стерлинг (11), Ракитич (20), Неймар (29), Коларов (60), Бускетс (76).