ФИФА ташкилоти ЖЧ-2018 саралашидан ўрин олган Англия – Шотландия (11 ноябрь) ўйинида жамоаларга лола-қизғалдоқ тасвири туширилган мотам боғичларида майдонга тушишлари учун рухсат бермоқчи эмас.
Эслатиб ўтамиз, шу куни Британия ҳамдўстлиги мамлакатларида урушда ҳалок бўлганларнинг хотираси куни нишонланади, лола-қизғалдоқ эса бу маросимнинг рамзий белгиси ҳисобланади. Бироқ, ФИФА қоидаларига кўра, жамоаларнинг либосида ҳеч қандай сиёсий рамзлар бўлмаслиги лозим.
ФИФА бош котиби Фотма Самура бу воқеа юзасидан ўз фикрини маълум қилди ва тақиқ бузиладиган бўлса, Англия ва Шотландия футбол федерациялари жиддий жазоланишини билдирди.
«Биз баъзи нарсаларга рухсат беришимиз мумкин эди. Аммо қоидалар ҳамма учун бир хил. Буюк Британия – урушда жабрланган ягона давлат эмас. Сурияни мисол келтириш мумкин. Африкада ҳам кўп йиллардан буён урушлар давом этмоқда. Нега энди бир мамлакат учун рухсат бериб, бошқаларга тақиқлашимиз лозим? Агар қоида бузиладиган бўлса, улар ҳар қандай жазога тайёр туришлари лозим» - деди Самура ВВС хабарида.
Эслатиб ўтамиз, аввалроқ ФИФА тақиқи бўлишига қарамай, терма жамоалар лола-қизғалдоқ рамзи туширилган мотам боғичларида майдонга тушмоқчи экани маълум қилинган эди.
