Филиппинлик боксчи Мэнни Пакьяо WBO версияси бўйича жаҳон чемпионлиги учун жангда америкалик Жесси Варгасни мағлубиятга учратганидан сўнг фаолиятини давом эттиришни режалаштирмоқда. Бу ҳақда у беллашувдан сўнг ESPN телеканалига маълум қилди, деб хабар беради «ТАСС».
6 ноябрь, якшанбага ўтар кечаси Пакьяо Лас-Вегасда бўлиб ўтган 12 раундли жангда ҳакамларнинг якдил қарорига кўра очколар бўйича ғолиб чиқди ва жаҳон чемпионлигини қўлга киритган тарихда биринчи сенатор бўлди.
У жорий йил апрель ойида америкалик Тимоти Брэдлини мағлуб этганидан сўнг Филиппин сенатига сайловлар туфайли боксдаги фаолиятини якунлагани ҳақида эълон қилганди. Бироқ кейинчалик бу фикридан қайтди ва августда Варгас билан жанг учун шартномани имзолади.
«Келгуси беллашув бўйича промоутерим Боб Арум билан гаплашиб кўраман. Жанг ким билан бўлишини билмайман, лекин мухлислар истаган рақиб билан рингга чиқишга тайёрман», — деди 37 ёшли спортчи.
