Жанубий Африка Республикаси терма жамоасининг бош мураббийи Эфраим Машаба мамлакат футбол федерацияси қарорига кўра терма жамоада ишлашдан четлатилди.
Бунга сабаб сифатида, «интизомни бузганлик» айби кўрсатилди.
12 ноябрь куни ЖАР ўз майдонида, ЖЧ-2018 саралаши доирасида Сенегал термасини қабул қилиб, 2:1 ҳисобида ғалаба қозонган эди. Ўйиндан сўнг Машаба матбуот анжуманига 1 соат кечикиб келди ва федерация раҳбарияти шаънига танқидий гапларни ёғдирди. Катта эҳтимол билан шу воқеа уни терма жамоадан четлатилишига сабаб бўлган.
Айни пайтда ЖАР ЖЧ-2018 саралашининг гуруҳ босқичида 4 очко жамғариб, Буркина Фасо билан пешқадам бўлиб турибди. 15 ноябрь куни терма жамоа Мозамбик билан ўртоқлик ўйинини ўтказади. Унда жамоани Машабанинг ёрдамчиси Оуэн да Гама бошқариб боради.
